على موعد لقا حبـك أجي ملهـــوف تـلـقـانــي
عيونٍ بالوفا تشــرق ..وقلبٍ للهــــوى جذّاب

شموعي بالفرح تضوي .. ويزهـر ورد بستاني
وعيني بلاك ما تقوى تعيش بلا نظر واصحاب

تذكرت اللقـــا الأول .. غرامٍ شــب باحضاني
غريبة كانت عيونك .. بها شوقٍ يــداري عتاب

وهمسك صاحب انفاسك ونبضك حرّك اشجاني
وكفك .. يا دفا كفك .. يصحـي بي حنين أحباب

وكحلٍ باقي بخـــدٍ .. عجزت انســـى وينساني
بقالي من مواعيــدك .. يخـــالط دمعك المنساب

بوسط كتاب للـذكرى ..كـــتبـــت أهواك ..تهواني
وبيتٍ في ظهر صورة .. ونقـــشٍ في زوايا الباب

قلادة تحمل حروفـــــــك .. تثير اشواق وجداني
حبيبي ما ني بناسي ولـــــــو كان الزمن غرّاب

مضى ميعادك الأول .. وجا ميعـــــــادك الثاني
وأنا بعدي على حبّك .. غزلت من الهيام ثياب