الموضوع: ابصراحه ودي اعرف من اكون....

من أكون

قلب يخفق في جنون

أو أكون

عاشقٍ هايم بحبه ومالقى صدرٍ حنون

من أكون

في زمن زادت جراحه

والحزن واضح نجاحه

والفرح أصبح بعيد

والألم زاد بصياحه

إبصراحه

ودي أعرف من أكون

يازمن قاسي عليا

ليه بس هالحزن ليا

وش تبي فيني أنا

والحزن فيني هنيا

لابغيت أضحك بكيت

يعني فيني وش نويت

حزنك القاسي عرفته

ومن جروحك إرتويت

يازمن منهو أنا

كل مافيني عنا

يازمن تكفى تجاوب

هو موتي لي دنا

يامعلمني قساتك

غير حزني وش حياتك

قول لتخبي علي

دمعي هو كل أمنياتك

شوف كم مره بكيت

كل هذا ومكتفيت

وش تبي أكثر تسوي

مَيت ولاني بميييت

يامتعبني كفايه

قلبي حددلي النهايه
يرفض الوضع المهين

في كواليس الحكايه

يازمن أطلق سراحي

خلني بجمع جراحي

وأرتحل عنك بعيد

لين ماتسمع صياحي

وقتها يمكن أكون

إني أعرف من أكون

وحينها لاماأُبالي

دام هذا الي بغيته

وإنتظرته وإرتجيته

في زمن موت الأماني

وحلم بيديني طويته

يازمن خابت ظنونك

كنت تحسب ماأخونك

برحل وعندي رجآء

خل دمعاتي بعيونك

يمكن إتحس بحنينك

ودمعتي تبقى تدينك

حينها تعرف خطاك

واضح تشوفه بعينك

حينها مقدر أسامح

ماأمد إيدي وأصافح

يمكن آخذ من طباعك

قسوه من ذيك الملامح

وأتركك تبقى وحيد

مع دموعٍ لك تزيد

لاحبيبٍ لك يواسي

لا ولاحولك عضيد

بترك الحزن بعيونك

يمكن الدمعه تخونك

تخذلك لا ماتجيك

مهما زادت بك طعونك

حينها باخذ غراري

وأحرق أنفاسك بناري

وأتركك تبكي عليك

وأعلن بنفسي إنتصاري