الموضوع: تأخـــــــــــرتي....

تـــــأخرتي....

تأخرتي وقلت انك نسيتي موعد الليله
............... نسيتي موعد عشنا على رجواه بالساعه
نسيتي موعد كانت امانينا تنادي لـه
............... نسيتي موعد قلوب تروم الوصل ملتاعه
نسيتي عاشق هدت هموم البارحه حيـله
............... تركتيه بظلام اليم وحده يطوي شراعـه
يلم اللي بقا منه دموع فوق منديلـه
............... يطيع الوقت دام الوقت عيا يعلن الطاعه
بنظره يسأل الشمعه عن غيابك وتبكي له
............... تذوب من الحزن شمعه وقلبه ذاب بأوجاعه
يمد ايديه يطفيها يساير قله الحيله
............... بعد مانور آماله طغى واستشهر شعاعه
وهو في غمره احزانه يحط الهم ويشيله
............... قتلتي بضحكتك صمت تعلى منبر اسماعه
واثرك ماتأخرتي عن اللي بيننا الليله
............... ولكني من اللهفه طلعت مقدم الساعه