الموضوع: رحله الى عاصمة العزوبيه

رحلة الى عاصمة العزابية
رجعت للبيت وانا متحطم كل مكان ادور فيه يقولون ممنوع العزوبيه هذا المكان للعوائل
لين ماطقت كبدي من هالكلمة وكالعادة فتحت النت ودخلت على منتديات
قطرات حقتي

<<=== قط فيه الولد

واشوف صندوق الرسائل الخاصة عندي فيه ثلاث رسائل
الاولي من مشرفتنا دلوعه تقول فيها انه تم نقل مشاركتك لمنتدي الاصدقاء
واياني واياك تعودلها والله لاخلي اذاني واذانك اربع

والرسالة الثانيه من واحد الله يستر عليه
يقولي وش قصدك بالصورة اللي حاطها

والرسالة الثالثه هي الغريبه مره وهي مرسوم او بينا من ممكلة عزبونيا
مسوين لي دعوه ومعطيني الجنسية بعد

انا اول ماقريتها ماصدقت خبر معقوله بطلع للدوله هذي وانا اول مره اسمع عنها
لا ومعطيني بعد الجنسية على طول

وقلت ياولد مابدهاااااش الدعوه حر هاليومين وزحمة وقلت حيا وانا اعزوبي محدن معبرني ولا احد ناشدن عني
وراه ما اروح هناك بعدين جتني دعوه خاصة والله اطمر لمكتب الخطوط واحجز قلت بحجز على الخطوط
السعوديه اخر وداع لي يعني ختامها مسك على قولتهم لكن حسبي الله عليهم من دروا اني اعزوبي
حطوني في مؤخرة الطيارة عند الشكمان

وصلت المطار وانا كاشخ على سنقة عشره وكل هدومي ثوب اصفر وغتره مديون فيها
واول مادخلت الصالة وحطيت بقشتي بالجهاز الا وهو يقوم يطوطي خير عسى ماشر
ويطلع بالشاشة ارهابي لالا امزح وين ارهابي تهون ارهابي عند الكلمة اللي طلعها لي
طلع على الشاشة (( عزوبي )) وهم اللي يمسكوني ويطلعوني من الصالة ويحطوني في حوض سيارة سحب الطيارة
ويدخلوني الطيارة مع العفش وقلنا معليش فداء هذا اليوم الاخير
لكن المصيبه انهم نزلوني وقالوا انتظر لين نشوف طيارة طالعه لعزوبيان كلها عزوبيه
والله واجلس بالمطارسبع ساعات
(( كالعاده لما تجي تسافر من الشرقيه الى جدة يعني لو تسافر خط شرط توصل قبل الطيارة ))

ومليت ويلعن ابوها حالة وكل من مر علي يطالع فيني باحتقار تقول مسوي له شي
المهم طلعت ورحت احجز على خطوط عزوب ايريا الله يخليها لنا وعلى طووول
رحبو فيني وعطوني درجة اولي
(( ازين ما بالدرجة الاولي انهم يشاورونك وش تشتهي وانت اقعد تدلع عليهم ))

والطيار كان يعلن عن وصولنا لعزوبيان وانا اللي افكر الحين وش اسوي هناك ماعرف احد ولا احد يعرفني
وين اروح المهم وانا بالهواجيس هذي وامشي في الممر اللي يودي الى بوابة الخروج من المطار
ودموعي شوي وتنزل من عيوني الا وانا اشوف هالاستقبال واللوحات مرفوعه باسمي مكتوب فيها
(( حكومة وشعب عزبونيا يرحبون بمقدمكم الميمون اهلا وسهلاهااااوي مع تحيات
امانة مدينة عزبونيا ))

وانا منب مصدق نفسي واجتاحتني حالة ذهوول وانصدام
مما انعقد معها لساني لمدة اسبوع معاد عرفت اهرج
(( زي القروي اللي اول مادخل الرياض وشاف هالتطور جلس يصيح اسبوعين ويقول الله يخلف علينا
بيبانا اذا فتحناها كود نرجفها وبيبانهم من حالها تفتح ))

وكان ياجماعة الخير استقبال يحبه قلبك والله لو اقولكم من اللي استقبلني ماراح تصدقون
استقبلني وزير الداخلية بكبره وكان بمعيته مجموعه من المستشارين والوزراء والبشكه
انا كنت احسبهم يستهبلون والله واثر الدعوه جد واركب مع طويل العمر وصرنا نمشي بشوارع
عاصمة عزبونيا .

كان الوضع عادي جدا لكن خطمة علينا سيارة كلها عوائل ومادريت الا الوزير يقول للحرس اللي معه
وقف هالسيارة وعطه مخالفة ليش يسقط على موكب عزوبي .
انا استغربت من هالسالفة يوقفون سيارة عوائل ويعطونهم مخالفة علشان عزوبي ماعلينا
سكت وقلت خلني اشوف اخرتها وصلنا عند باب قصر بحي فخم وراقي جدا ويقولي هذا قصرك يالعزوبي.
لكن قلت له : طيب والعوائل اللي بجنبي اكييد بيقولون لي اطلع .
قال الوزير : مايخسى الا هم مابقي الا عوايل يتكلمون على العزوبي ماعليك منهم
هذا قصرك وسو زي ماتبي وخذ راحتك واذا جتك مضايقات من البنات والعوايل بس اتصل علينا
وحنا نوريك شغلهم .

كفو والله ياطويل العمر

وادخل قصري واشوف الخدم والسواقين عندي ويالله عزوبي يامر وينهي بعد
وعنده احد يغسل ملابسه بدال يماني المغسلة اللي ذلنا عند كل غسلة

ودخلت الصالة والا التلفون يدق علي وارد عليه : نعم
المتصل : ياهلا وغلا بالعزوبي حياك الله يالطيب .
انا : ياهلا من معي يالطيبه .
المتصل : انا وحده ودي اتعرف عليك شفتك اول ماوصلت القصر قلت فرصه
اكون اول بنت تشبك هنا
انا : وجع عيب عليك وش هالحمي ياللي ماتربيتي <<== ايه هين اقول كذا
الخلا بس . واصكر السماعه .
وانا جالس اتمقل بالقصر واشوف السيارة عند الباب صالون مضلل يحبه قلبك
واطلع والا السواق واقف عنده وفتح لي الباب وقالي وين تبي ياطويل العمر
انا استغربت والله لكن فرحان احد يعطيني وجه وقلت له اطلع ودي اتمشي بشوارع عزبونيا
ودي اشوف هالاسواق يمكن ارقم لي بنت. السواق استغرب وطلع بي يتمشي

المهم انا نزلت الدريشه شوي بس علشان اشوف لوحة محل طبعا القزاز كان مضلل والسيارت زحمه علي
والا مايمداني انزل الدريشه الا خذ انواع الترقيم وتجديع الارقام وانا اشوف من هالغلطان يرقم ولد
واثري اشوف بنت الباديه بالروفر حقها ترقمني هي وخوياتها ياولد وش بلاهم هالبنات
ويقولي السواق مافيه خووف بابا هازا كله نفر سوي كذا من يشوف ولد على طول سوي ترقيم
الحين يجي دوريه وامسك هازا نفر تعبان
(( تخيلوا بناتنا موقفين على جنب وتفتيش من قبل الدوريات وناسة ))

وخذ انواع الترقيم اللي حاطه البريد الالكتروني على شنطة السيارة<<== ترقيم اخر موديل
واللي مطلعه صحيفة كبيره وكاتبه رقمها وكاتبة تكفي تواضع وعطنا وجه .
بصر احه كنت مبسووط على الاخر اثري مهم وانا مدري وكل البنات يتمنون بس اعطيهم وجه
لكن معصي والله
قسم بالله لا اقطع قلوبكم زي ماقطعتو قلوبنا في كل مكان

وقلت للسواق اطلع للسوق وهو اللي ينط لسوق الراشد طبعا راشدهم يختلف عن راشدنا اللي هنا
وانا امشي واتمخطر بدخل السوق والا اشوف الوفاء عند المدخل وهي
اللي تصفر وتقول ياهوو ياقميييل ياحلوو انت من قدك وانا اللي استحي بس ولو صرت ثقل

تصدقون ياجماعه الخير بغيت اخق من اول تصفيره لكن جت الهيئة وقشعتها
ياخي رحمتها يوم شفتهم مركبينها الجمس بس احسن تستاهل
وانا اهموو بالدخول الا وحده تقولي تكفي الله يخليك دخلني معك واذا دخلت السوق
لا اعرفك ولا تعرفني وانا اقول طيب كم تدفعين¿

(( زي وحده الله يذكرها بالخير كان توقف عند ملاهي الجنغل لاند وتدخل الشباب بخمسين ريال ))

وقالت ادفع لك اللي تبي ¡ قلت خلاص يدك على مية ريال وهي اللي تدفع لي وادخلها معي للسوق
في ذلك الوقت اصابتني نشوة الانتصار على البنات واحس اني بذلهم ذل
وصرت امشي وكل ماشفت مجموعة بنات اصارخ عليهم واقولهم عيب عليكم يابنات مهوب غصب اخذ ارقامكم
وهم يخافون ويرجفون من الخوف يركضون يطلعون من السوق وانا استانس كل ماشفتهم يركضون قدامي
تقول ارانب

مالكم بطولت االسالفة والسوالف اللي صارت لي بالسوق ذاك اليوم بس وانا طالعه من السوق
قصدي وانا طالع من السوق معليش ضيعت بالسوالاف شوي
واشوف هاك الوحده اللي تهبل تجنن والله ياهي تاخذ العقل وانا اللي اصمل الا برقمها
بس المشكله مامعي ورقة ياولد وش الحل
لازم ارقمها يعني لازم ارقمها الله لايعوق بشر والله واجيك امر من عندها
وهي المسكينه اول ماشافتني مقبل وهي تتغطى على طول وتصد بوجهها عني وتوخر عن الدرب علشان امر
وانا اللي استغرب وش بلاها الحين يقالها عاقلها مهب راعية هالحركات ذي وانا اقولها مشكوره يالغاليه
بس الدرب يوسعنا جميع وهي تقول لا هنا مانقدر نتعرض للعزوبيه ابد وانا اقولها لا عادي يالحلوه
<<== عزوبي داشر

وهي تنبسط وتفل حجاجها وقلت لها انا مستعجل الحين تبيين شي <<== احتريها تقول طيب ممكن تاخذ رقمي

وهي تقول وش دعوه والا حنا ثقيلين عليك يااحلي من القمر

وانا اللي اخق من جد واقول في نفسي وينكم ياناس تشوفن هالبنت وش تقول عني مهوب زيكم
ماغير تنادوني تمساح
وانا اقولها لا والله بس اخاف اختي تشك فيني

وهي تقول طيب هذا رقمي ارجو انك تتصل فيني انا انتظرك بعد 12 بالليل ياقمرهم
وتعطيني الرقم وانا اطير من الفرحة يارربيه حبيتها ياجمااعه وهي واعدتني بالزواج خخخخخخخخخخ

<<== طــمــر بالسالفة


وانا ماشي بالطريق راجع للبيت والا اشوف نقطة تفتيش قدامي وانا اللي اقول
اعوذ بالله الحين وش يبي يفكنا من هالتفتيش مادريت الا الضابط حقهم
يقول للعسكر حركو السيارات على جنب فيه سيارة تقل(( تحمل ))عزوبي <== متعوووب عليها
وانا انبسطة الله ابوها حاله ويني من زمان عنهم ياخي
وامشي وانا كلي غروور ويوم مريت على نقطة التفتيش واشوفهم موقفين مجموعة بنات
وهات تصفيق وتفتيش وتقشيع تضليلات وبالماريه كان معهم غيوض وشلتها
خلوها تفك التضليله الورديه وترفع موترها

وانا مايمداني اتعد هالنقطة الا وتجييني طفااااااااااااااااااااااا ااية
تمشي شليوووون وانا اللي يصيبني ذهوول
واسمع صوت المطوع حق الهيئة يقولي : اسمع يالداشر اشوفك مرتن ثانيه
تدور هنا بالشارع هذا بنحولك للسجن ونجلدك جلد
وانا اقوله وهالتكميخ اللي جاني وش يصير اجل
وهو اللي يرقعني بثقالت الورق وقالي مابعد شفت شي انت وامثالك لازم نربيكم
ونعلمكم الادب

واقوله ياخي بكره ان شاء الله نتزوج ونصير عوايل وش يفرق عنا وحنا عزابيه طيب

واطلع من قسم الهيئة وجهي كله رقوع وشقوق وطق من وين ماتونس وجع طاقيني
واثري من اليوم كنت انجلد منهم وانا احلم في مملكة العزوبيه الله يخليها لنا

قفلة الموضوع

1/ ياعيال ارحمو بنات المسلمين من معاريضكم وقراطيس الترقيم اللي ماليتن الشوارع
2/ اذا شفت بنت خلك ثقلك لاتنجرف وراها
3/ يابنات الله يصلحكم اذا طلعتو للسوق مهوب لازم تكبين غرشة العطر كلها وتطقين اكشخ ملابسك
4/ متى بترحمون العزوبي وتراعون ضروفه وتحطون له مكان يمتشى فيه براحته
5/ ليت هالدوله تكون حقيقة


تحياتي لكم ...
هـااااوي